A Educación Física e as TIC
Esta bitácora estará adicada as relacións existentes entre a área de educación física e as tecnoloxías da información e a comunicación.

Un dos bloques temáticos que trata a educación física escolar é a EXPRESION CORPORAL. E dentro deste bloque podemos realizar coreografías para que o alumnado practique exercicios físicos seguindo un ritmo musical de fondo. A modo de exemplo podemos amosar varios vídeos.

A creación dun blog é algo sinxelo e para ver como se pode facer con nireblog.com preme aquí.

   En moitas ocasións as clases de educación física non poden realizarse nun espacio axeitado. Ben pola falta dun espazo  cuberto ou ben polas inclemencias meteorolóxicas adversas nas horas de coincidencia con outro profesor. Nestes casos é necesario ter algúns recursos alternativos para desenvolver cos alumnos: xogos de mesa ou ben  actividades interactivas na rede.

   A busca de recursos axeitados para traballar en internet non é sinxela dada a gran cantidade de páxinas web nas que aparecen xogos interactivos que non sempre están adaptados ás idades dos alumnos, polo que é necesario facer un filtro previo de moitas desas páxinas, que en ocasións están aloxadas en portais para adultos e con contidos para adultos.

    Con este obxectivo pretendo realizar unha seleción dalgunhas aplicacións interactivas que servan para as clases de educación física e que irán aparecendo no apartado de ligazóns.

   A área da Educación Física escolar é unha disciplina eminentemente práctica, xa que a maioría dos contidos curriculares que ten que desenvolver implican a realización de exercicios físicos por parte do alumnado. Non obstante, a utilización das Tecnoloxías da Información e a Comunicación (TIC) están directamente relacionadas coa mellora da calidade no proceso de ensino-aprendizaxe nesta materia. Tanto o alumnado como o profesorado ten acceso á información dun xeito inmediato, permitindo a elaboración de ferramentas didácticas para desenvolver os aspectos relacionados cos obxectivos, contidos e procedementos desta área curricular.
    A comunidade virtual que participa na internet permite o acceso a inmellorables fontes de información e comunicación entre os profesionais da educación físca. O espiritu colaborativo de construír o coñecemento mediante a compartición dos documentos persoais de traballo de cada profesor fai máis doado o progreso e o cambio metodolóxico que está producíndose na escola pública. 

    O alumnado dispón de infinidade de recursos prácticos para desenvolver as súas capacidades intelectuais. O profesorado conta con recursos de todo tipo para elaborar as súas unidades didácticas, grellas de avaliación ou aplicacións interactivas que permiten desenvolver as capacidades do seu alumnado.